Amatora yo gusimbura umudepite: Kwiyamamaza kw'abakandida birakomeje

Igikorwa cyo kwiyamamaza kw’abakandida mu matora yo gusimbura umudepite kirakomeje mu Turere twose tw’Intara y’Amajyepfo

 

Kuva tariki 18 Ukuboza 2019, mu Ntara y’Amajyepfo hatangiye igikorwa cyo kwiyamamaza kw’abakandida mu matora yo gusimbura uwari Umudepite mu Nteko ishinga amategeko, Madamu Nyirarukundo Ignatienne  wari waratowe muri 30% by’imyanya yahariwe abagore mu Nteko Ishinga amategeko wari waratorewe mu  Ntara y’Amajyepfo, ubu wahawe  izindi nshingano.

Amatora ateganyijwe tariki 08 Mutarama 2020.

Abakandida cumi na bane (14) nibo bemejwe na Komisiyo y’Igihugu y’amatora kwiyamamaza muri ayo matora, ni aba bakurikira :

-         MUCYO KEZA M.Claire

-         MUKABALISA Germaine

-         MUTESI Joy

-         UWONKUNDA Marie Chantal

-         AHOBANTEGEYE Charlotte

-         UWIHOREYE Marie Jeanne

-         MUSHIMIYIMANA Laurette

-         NYIRANKURIZA Martine

-         MUKAGATANA Fortunée

-         NYANZIRA Marie Josée

-         MUKAMUSONERA Marie Claire

-         NYIRANDAYISABYE Christine

-         INGABIRE Domitille

-         KAYIREBWA Pélagie

Kwiyamamaza byatangiriye mu Karere ka Nyamagabe, kandi bitegayijwe ko abakandida bazagera muri buri karere. Mu rwego rwo korohereza abiyamamaza no kubegereza  abagize inteko itora, hateganyijwe ‘site’ ebyiri (2) zo kwiyamamarizaho muri buri Karere.

Mu kwiyamamaza abakandida  bavuga imyirondoro yabo, amashuri bize, imirimo bakoze, ubunararibonye bwabo, bakitaka bivuga ibigwi, mbere yo gusaba amajwi abagize inteko zitora , buri wese avuga ko ashoboye kandi ko azafatanya na bagenzi be b’Abadepite mu gutora amategeko ababereye, no kugenzura ibikorwa bya Leta, nk’uko biri mu nshingano z’Abadepite.

Biteganyijwe ko Iki gikorwa cyo kwiyamamaza kizasorezwa mu Karerere ka Kamonyi,  tariki 05 Mutarama 2020, amatora akazaba tariki 08 Mutarama 2020.